Tuesday, May 12, 2015

எழுத வேண்டும் ! ஏதாவது

எழுதவேண்டும்
எதை 
எப்படி 
எவ்வாறு என்பதெல்லாம் பொருட்டே இல்லை!

தூசு படிந்த மேஜை
மை காய்ந்த பேனா
மடித்து கசங்கிய காகிதங்கள் 
இவற்றையெல்லாம் தாண்டி எழுதவேண்டும்.

நேரமின்மை
சோம்பல் ,அசதி
துக்கம் ,தூக்கம் இவற்றையெலாம் 
தாண்டி ஏதாவது எழுதவேண்டும் .

ஒரு நீண்ட வீதி வழி பயணிக்கும் 
என் எண்ணங்களை நிறுத்தி வைக்கவும் , உயரம் தாண்டி போய்கொண்டிருக்கும் உணர்ச்சிகளை ஒடுக்கி வைக்கவும் 
ஏதாவது   எழுத வேண்டும் .

உள்ளே ஓடிக்கொண்டிருக்கும் என்
உணர்வுகளுக்கு வடிகால் இடவும்
எப்போதும் முகாரி ராகமே இசைக்கும் வாழ்க்கை வயலீனைமீட்டெடுக்கவும்
ஏதாவது எழுத வேண்டும்  .

என்னோடு மோசமாய் குடும்பம் 
நடத்தும் "தனிமை " மனைவியை
தொலைக்க வல்ல சக்களத்தி அதுதான் ,
அதுக்காகவேனும் ஏதாவது எழுத வேண்டும் !!!